2011ರ ಕೆಎಎಸ್‌ ನೇಮಕ ಅಕ್ರಮ: ರಾಷ್ಟ್ರಪತಿ, ಪ್ರಧಾನಿ ಕಚೇರಿಯಿಂದ ದೂರು ಪರಿಶೀಲನೆಗೆ ಸೂಚನೆ

ಶ್ರೀಕಾಂತ್‌ ಹುಣಸವಾಡಿ

ಬೆಂಗಳೂರು: 2011ನೇ ಸಾಲಿನ ಕೆಎಎಸ್‌ ಪರೀಕ್ಷೆಯಲ್ಲಿ ಆಯ್ಕೆಯಾಗಿ ನಂತರ ನ್ಯಾಯಾಲಯಗಳ ತೀರ್ಪಿನಿಂದಾಗಿ ಕಂಗೆಟ್ಟಿರುವ 362 ಅಭ್ಯರ್ಥಿಗಳ ಪತ್ರಾಂಕಿತ ಹುದ್ದೆಯ ಕನಸಿಗೆ ಸರಕಾರ ಮರುಜೀವ ನೀಡುವ ಪ್ರಯತ್ನ ನಡೆಸುತ್ತಿದೆ. ಈ ಮಧ್ಯೆಯೇ, ಹೈಕೋರ್ಟ್‌ ಮತ್ತು ಸುಪ್ರೀಂಕೋರ್ಟ್‌ ಇಡೀ ನೇಮಕ ಪ್ರಕ್ರಿಯೆಯನ್ನು ರದ್ದುಗೊಳಿಸಿದ್ದರೂ ಸರಕಾರ ಅದನ್ನು ಧಿಕ್ಕರಿಸುವ ನಿರ್ಧಾರವನ್ನು ಕೈಗೊಳ್ಳುತ್ತಿದೆ ಎಂದು ನೊಂದ ಅಭ್ಯರ್ಥಿಗಳು ರಾಷ್ಟ್ರಪತಿ, ಪ್ರಧಾನಿಯವರಿಗೆ ದೂರು ನೀಡಿದ್ದರು.

ದೂರು ಆಧರಿಸಿ ರಾಷ್ಟ್ರಪತಿ ಮತ್ತು ಪ್ರಧಾನಮಂತ್ರಿ ಅವರ ಕಾರ್ಯಾಲಯದಿಂದ ಪರಿಶೀಲಿಸಿ ಕ್ರಮ ಕೈಗೊಳ್ಳಲು ರಾಜ್ಯ ಸರಕಾರಕ್ಕೆ ಸೂಚಿಸಿದೆ. ಹಾಗಾಗಿ ರಾಜ್ಯ ಸರಕಾರ ಆ ಪತ್ರಗಳನ್ನು ಆಧರಿಸಿ ನಿಜಕ್ಕೂ ಕ್ರಮ ಕೈಗೊಂಡರೆ ಮತ್ತೆ ಪ್ರಕರಣಕ್ಕೆ ಹೊಸ ಆಯಾಮ ದೊರಕಬಹುದು.

15 ದಿನಗಳಲ್ಲಿ 2011ರ ಕೆಎಎಸ್‌ ನೇಮಕ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲಾಗುವುದೆಂದು ಕಾನೂನು ಸಚಿವ ಜೆ.ಸಿ.ಮಾಧುಸ್ವಾಮಿ ವಿಧಾನಸಭೆಯಲ್ಲಿ ಪ್ರಕಟಿಸಿದ್ದಾರೆ. ಆದರೆ ಏನು ಎಂಬುದನ್ನು ಹೇಳಿಲ್ಲ. ಕಳೆದ ಮೇ 27ರಂದು ಸಂಪುಟ ಸಭೆ, 2011ನೇ ಬ್ಯಾಚ್‌ ನೇಮಕ ಪ್ರಕರಣದ ಸಂಬಂಧ ಆರೋಪ ಎದುರಿಸುತ್ತಿದ್ದ ಅಂದಿನ ಕೆಪಿಎಸ್‌ಸಿ ಅಧ್ಯಕ್ಷ ಗೋನಾಳ್‌ ಭೀಮಪ್ಪ, ಸದಸ್ಯರಾದ ಮಂಗಳಾ ಶ್ರೀಧರ್‌, ಪಾಟೀಲ್‌ ಮೊದಲಾದವರ ವಿರುದ್ಧ ಆರೋಪಗಳನ್ನು ಕೈಬಿಡಲು ನಿರ್ಧಾರ ಕೈಗೊಂಡಿತ್ತು. ಈ ನಿರ್ಣಯವನ್ನು ರಾಷ್ಟ್ರಪತಿಗೂ ಕಳಿಸಲಾಗಿತ್ತು.

ಸುಗ್ರೀವಾಜ್ಞೆಗೆ ಕಸರತ್ತು:
ಈ ಮಧ್ಯೆ, ಹೈಕೋರ್ಟ್‌ ಹಾಗೂ ಸುಪ್ರೀಂಕೋರ್ಟ್‌ ಆದೇಶಕ್ಕೆ ವಿರುದ್ಧ ವಾಗಿ ಸರಕಾರ ಆಯ್ಕೆಯಾಗಿದ್ದ 362 ಅಭ್ಯರ್ಥಿಗಳನ್ನು ರಕ್ಷಿಸಲು ಸುಗ್ರೀವಾಜ್ಞೆ ಜಾರಿಗೊಳಿಸಲಿದೆ ಎಂಬ ಮಾತು ಕೇಳಿಬರುತ್ತಿದೆ. ಸರಕಾರಕ್ಕೆ ಆ ರೀತಿ ಮಾಡುವ ಅಧಿಕಾರ ಇದೆ. ಆದರೆ ಮುಂದೆ ಅದು ನ್ಯಾಯಾಲಯದ ಮೆಟ್ಟಿಲೇರಿದರೆ ಆಗ ಹೇಗೆ ಅದನ್ನು ಸಮರ್ಥಿಸಿಕೊಳ್ಳಲಿದೆ ಎಂಬ ಪ್ರಶ್ನೆ ಎದುರಾಗುತ್ತದೆ.

''ಈಗಾಗಲೇ ಹೈಕೋರ್ಟ್‌ ಮತ್ತು ಸುಪ್ರೀಂಕೋರ್ಟ್‌ ಸಂಪೂರ್ಣ ನೇಮಕಾತಿಯನ್ನೇ ರದ್ದುಪಡಿಸಿರುವ ಹಿನ್ನೆಲೆಯಲ್ಲಿ ಸರಕಾರ ಏನೇ ಮಾಡಿದರೂ ಅದು ವ್ಯರ್ಥ ಕಸರತ್ತಾಗುತ್ತದೆ ಮತ್ತು ಕಾನೂನು ಲೋಪವಾಗುತ್ತದೆ. ಹಾಗಾಗಿ ಸರಕಾರ ವಿಶೇಷ ನೇಮಕ ಪ್ರಕ್ರಿಯೆ ನಡೆಸುವುದೇ ಸೂಕ್ತ''

-ಎನ್‌.ಸಂತೋಷ್‌ ಕುಮಾರ್‌, ಹೋರಾಟ ನಡೆಸುತ್ತಿರುವ ಅಭ್ಯರ್ಥಿ

ವಿಶೇಷ ನೇಮಕವೊಂದೇ ಸೂಕ್ತ
ಕೋರ್ಟ್‌ಗಳು 362 ಹುದ್ದೆಗಳ ನೇಮಕ ರದ್ದುಗೊಳಿಸಿರುವುದರಿಂದ ಸರಕಾರಕ್ಕೆ ವಿಶೇಷ ನೇಮಕ ನಡೆಸುವುದೊಂದೇ ಉಳಿದಿರುವ ದಾರಿ ಎನ್ನುತ್ತಾರೆ ಕಾನೂನು ತಜ್ಞರು. ಹಿಂದೆ ಇದೇ ರೀತಿಯ ಪರಿಸ್ಥಿತಿ ಎದುರಾಗಿದ್ದಾಗ 2004-05ರಲ್ಲಿ ಲೋಕೋಪಯೋಗಿ ಇಲಾಖೆಯಲ್ಲಿ ಎಂಜಿನಿಯರ್‌ ಗಳು ಹಾಗೂ 1988-89ರಲ್ಲಿ ಕಂದಾಯ ಇಲಾಖೆಯಲ್ಲಿ ತಹಸೀಲ್ದಾರ್‌ಗಳನ್ನು ವಿಶೇಷ ನೇಮಕಾತಿ ಮೂಲಕ ತುಂಬಿಕೊಳ್ಳಲಾಗಿತ್ತು. ಈಗಲೂ 2011ರ ಬ್ಯಾಚ್‌ನಲ್ಲಿ ಪರೀಕ್ಷೆ ಬರೆದಿದ್ದವರಿಗೆ ಮೊದಲ ಆದ್ಯತೆ ನೀಡಿ ಹೊಸದಾಗಿ ವಿಶೇಷ ನೇಮಕ ಪ್ರಕ್ರಿಯೆ ನಡೆಸಿದರೆ, ಎಲ್ಲ ಅಭ್ಯರ್ಥಿಗಳಿಗೆ ನ್ಯಾಯ ದೊರಕಿದಂತಾಗುತ್ತದೆ.

ಪ್ರಕರಣದ ಹಿನ್ನೆಲೆ:
2011ನೇ ಸಾಲಿನ ಕೆಎಎಸ್‌ ನೇಮಕ ಸಂಬಂಧ ಕೆಪಿಎಸ್‌ಸಿ 2014ರ ಮಾ.21ರಂದು 162 ಗ್ರೂಪ್‌ ಎ ಮತ್ತು 200 ಗ್ರೂಪ್‌ ಬಿ ಹುದ್ದೆಗಳ ನೇಮಕದ ಅಂತಿಮ ಆಯ್ಕೆ ಪಟ್ಟಿ ಪ್ರಕಟಿಸಿತ್ತು. ಡಾ.ಎಚ್‌.ಪಿ.ಎಸ್‌.ಮೈತ್ರಿ ನೇಮಕದಲ್ಲಿ ಅಕ್ರಮ ನಡೆದಿವೆ, ಆಯೋಗದ ಸದಸ್ಯರೇ ಹಣದ ಬೇಡಿಕೆ ಇಟ್ಟಿದ್ದರೆಂದು ದೂರು ನೀಡಿದ್ದರು.

ತನಿಖೆ ನಡೆಸಿದ್ದ ಸಿಐಡಿ, ಮೇಲ್ನೋಟಕ್ಕೆ ಅಕ್ರಮ ಸಾಬೀತಾಗಿಯೆಂದು ಹೇಳಿ, ಕೆಪಿಎಸ್‌ಸಿ ಅಧ್ಯಕ್ಷರಾಗಿದ್ದ ಗೋನಾಳ್‌ ಭೀಮಪ್ಪ ಮತ್ತಿತರ ಅಧಿಕಾರಿಗಳು ಅಕ್ರಮವೆಸಗಿದ್ದಾರೆಂದು ಖಚಿತಪಡಿಸಿ 10ಸಾವಿರ ಪುಟಗಳ ವರದಿ ನೀಡಿತ್ತು.

ಡಿಪಿಎಆರ್‌ ವಿಧಾನಸೌಧ ಠಾಣೆಯಲ್ಲಿ ದೂರು ದಾಖಲಿಸಿತ್ತು.'ಕ್ಯಾಷ್‌ ಫಾರ್‌ ಜಾಬ್ಸ್‌' ಎಂದೇ ಹೆಸರಾಗಿದ್ದ ಹಗರಣದಿಂದಾಗಿ, ನೇಮಕ ಪ್ರಕ್ರಿಯೆ ರದ್ದುಗೊಳಿಸಬೇಕೆಂಬ ಒತ್ತಡ ಹಿನ್ನೆಲೆ ಸರಕಾರ 2014ರ ಆ.14ರಂದು 2011ನೇ ಸಾಲಿನ ಕೆಎಎಸ್‌ ನೇಮಕ ಸಂಬಂಧ ಹೊರಡಿಸಿದ್ದ ಎಲ್ಲ ಅಧಿಸೂಚನೆ ರದ್ದುಗೊಳಿಸಿತ್ತು. ಆನಂತರ ಹೈಕೋರ್ಟ್‌ ಮತ್ತು ಸುಪ್ರೀಂಕೋರ್ಟ್‌ ಸಂಪೂರ್ಣ ನೇಮಕ ಪ್ರಕ್ರಿಯೆ ರದ್ದುಗೊಳಿಸಿತ್ತು.