ವೈಯೆನ್ಕೆ ಅವರು ಒಂದು ರಾತ್ರಿಯೂ ಬಿಟ್ಟವರಲ್ಲ. ಸತತ ಐವತ್ತು ವರ್ಷಗಳವರೆಗೆ ನಿರಂತರವಾಗಿ ಗುಂಡು ಹಾಕಿದವರು. ಕುಡಿಯುವುದಕ್ಕೆ ‘ಗುಂಡು ಹಾಕುವುದು’ಎಂದು ಹೆಸರಿಟ್ಟು ಜನಪ್ರಿಯ ಮಾಡಿದವರೂ ಅವರೇ. ವಿಚಿತ್ರ ಅಂದ್ರೆ ಅರ್ಧ ಶತಮಾನ ಕಾಲ ಒಂದು ರಾತ್ರಿ ಸಹ ಬಿಡದಂತೆ ಗುಂಡು ಹಾಕಿದರೂ, ವೈಯೆನ್ಕೆ ಅವರು ‘ಔಟ್’ಆಗಿದ್ದನ್ನಾಗಲಿ, ವಿಚಿತ್ರವಾಗಿ, ವಿಪರೀತವಾಗಿ ವರ್ತಿಸಿದ್ದನ್ನಾಗಲಿ ನೋಡಿದವರಿಲ್ಲ. ಅವರನ್ನು ‘ಕುಡುಕ’ಎಂದು ಯಾರೂ ಕರೆಯಲಿಲ್ಲ. ಕುಡಿತಕ್ಕೆ ಶಿಸ್ತಿನ, ಸಂಯಮದ ಹಾಗೂ ಶಿಷ್ಟಾಚಾರದ ಪರಿಧಿಯನ್ನು ಹಾಕಿ, ಕುಡಿಯುವ ಸಮಯವನ್ನು ಪಿಎಚ್‌ಡಿ(Precious Hour for Drinking) ದರ್ಜೆಗೇರಿಸಿದ ಅಗ್ಗಳಿಕೆ(ಪೆಗ್ಗಳಿಕೆ?) ವೈಯೆನ್ಕೆ ಅವರಿಗೇ ಸಲ್ಲಬೇಕು.